Saturday, December 23, 2017

Ber Bi Swêdê..

''Qûna mi kirî qeşa bigire. Bêhenek! (A rast mero naxwaze bi ‘qûn’ê dest bi meselê bike ku ser hala ev qûn bêmane qûna mero be. Axir..) Pîceme jî tune di bin mi de û a xerab mi bi xwe’r neanî, hek ya na eyn anihka li vir li orta ca’dê min ê li xwe kiriba. Wellehî mi nizanibû ku wê hewqe sar be. Dû-sê xort û keçik di ber mi re derbas bûn ku bi texmîna mi Îspanyol in. E dibêm cîk digerin ku xwe tê de vehewînin. Vêca ji xwe mersele ev bû; saet nîvê şevê li dor duda ye. Balafirgeh, Beauvais airport, girtî ye û divê hetanî şeşê sibehê em li bende bin ku vekin. Ne dikana Xalê Nezîr e mîratê!!’’

‘’Saet li dor yazdê nîvê şevê bi terempêleke şexsî gîham vir ku ji aplîkasyona Blablacarê mi pêde kiribû ku ev sîstem gelkî berbelav e li Ewropayê. Ger bi kurtî jê bikim behs lew bo mi jî ev cara pêşî bû tiştekî wilo bi kar tînim; kesek ji cîkî dire cîkî din bi terempêla xwe ya şexsî ku çûna xwe bi roj û saetê diyar dike li ser malperê û heçî bixwaze pê re here bi hesabê xwey bankê heqê rê jê re radizîne ku li gor otobês û teyaran gelkî erzantir e. Xweşbûna wê ew e ku mero kare bo rotayên çep hin kesan bibîne û ya jê xweştir tu însanên nûkîtop nas dikî. Bo balafirgeha Beauvaisê, ku şixulê saetek û deh deqe dûrî bajarê Rouenê ye, ji xwe ti trên û otobês tune ne xweşik. Lew cihê wê pirr çep e. Û erzanbûna bilêtên Ryanairê jî ji xwe ji vir tê ku teyara wan aqilben balafirgehên çûçik bi kar tînin; bifikir mi bilêta xwe ya Parîs-Stockholmê tenê bi 17 euroyan kirîbû ku ev şîrket li seranserê Ewropayê erzantirîn bilêtên teyarê difroşe mero. .. Nêzîkî du saetan li maseya cafeyekî, ew jî li derve bû, rûniştim. Hew mi debar kir ji ber sermê. Dema mi nerî koma ku di ber mi re derbas bûbû wa vedigerin bi alî min de tên, hema rabûm ser nigan û çûm pêrgî wan. Ti cî nedîbûn. Mi nerî teyara me yek e û ji mi re gotin ‘Wer em pev re bimeşin ya na tê biqefilî.’ Hetanî şeşê sibehê em di nav hewşa balafirgehê de çûn û hatin, çûn û hatin. Ji ber ku Îspanyol bûn mi go ez ji wan bipirsim bê ka li ser pirsgrêka Katalûnyayê çi difikirin. Heta tu bê bes bi ûslûbeke xweş û nerm ez bersivandim. Te dî pirsgirêka me ya bi tirkan re dihat hişê mi ku tirk nahêlin mero bêje kip li ser pirgirêka me. .. Jin û mêrek faris jî bi zarokê xwey incax yek salî re, ku ca wî ew di nav betaniyê de gebirandibû, li hêviya karkera bûn ku bên derî vekin ji wan re. Hişê mi li ser lêwik bû (Hej farisan dikim, belkî jî ji ber wê). Saet bû pênc û mi nerî karkerin hatin. Çûm cem yekî di cî de ku malbatê tev de têxe hundir. Pêşî qebûl nekir, digo ‘hîn saetek maye.‘ Mi go ‘Layê xwedê! Wê zarok biqerise li vir!’ Go ‘Bela heyra lê bila dê û lawik bên, kundirê bavê wan bila neyê.’ Me qebûl..’’
‘’Heyata mi de ev cara pêşî bû ku ez ê derketima gereke wilo dirêj heke di sibata borî de gera ji welêt a ji bo Gurcistan û Ermenîstanê nehesibînim. Bi dehan pirs hene di serî mi de û bi sedan pirs jî mi ji derûdorê kirine ji bo ku li ti derê nealiqim.’’
‘’Siheta we ne carek lê hezar carî nexweş ku we hetanî vê saetê em li derve hiştin. Axir em ketin hundir. Ji birçîna diketim. Mi derxist sandvîça ku mi çêkiribû û wilo zikîziwa xwar. Vêca xewê ez zep kirim. Hetanî nêzîkî saet nehan em tev razan. Pişt re rabûn, ketin rêzê. Bi şeref destê mi li ser dilê mi bû ku ditirsiyam pirsgirêkek derkeve ji ber bêqirdbûn û bêsi'ûdbûna mi. Û te dî ji ber ku di bêrîka mi de nebixêr pasaporta dewleta hovan hebû. Ecebmayî dimam dema ku mi ji lawikê Îspanyolî pirsin dikirin li ser vîzeyan ku ji mi re digo ‘Vîzeya çi oxlim?’ lew mi digo qey divê vîzeya hemi kesî hebe ger bixwaze derbasî welatekî din bibe. Û a rast mero dihesidî ji wan. Ma’z çi derewa bikim. Û mi bêhenek meraq dikir bê ka tişkî çawa ye ku mero bê vîze here welatekî din. Mi meraq dikir bi xwedê.’’
‘’Mi pasaport da zilêm..’’
‘’Bajo..’'


18.10.2017
Beauvais/Parîs


 (Tîpsîztirîn tîp..)




       (Mero dibê qey ez ê li Uzay Mekigi siwarêm. Oxlim teyare ye lann !)

No comments:

Post a Comment

Mîhrîcana Duçerxan

Ev ji bîst roj zêdetir li benda vê festîvalê bûm. Bi alîkarîya atolyeya Guidoline (atolyeyeke duçerxan e ku meriv dikare hemû amûrên wan be...